"పుట్టినరోజు" పుట్టిన.. రోజు !

అమ్మ కాళ్ళకి దండం పెడతాను..

నాకు దైవభక్తి లేదని నిందించిన నోళ్ళు మూగబోతాయి !

అమ్మ శుభశకునంగా ఎదురు రాగా యుద్ధానికి ఉద్గమిస్తాను..

దేవేంద్రుడు దిగివచ్చి ఇంద్రపదవి కట్టబెడతాడు!

అమ్మ నేర్పిన మాటలను అక్షరాలుగా పేరుస్తాను..

కవిత్వం కాళికలా కదను తొక్కుతుంది !

అమ్మ పేరును పదే పదే పలవరిస్తాను..

తన వేద సారమంతా ఒక్క మాటలో కుదించిన నన్ను గని.. చతుర్ముఖుడు సంభ్రమాశ్చర్యచకితుడౌతాడు !

అమ్మతనంలో మాత్రమే దైవత్వముంది..

ఎంత ఘోరతపస్సులాచరించినా స్త్రీత్వమే లేని మీకు దైవత్వమెలా సంక్రమిస్తుందని మహర్షులను నేను ప్రశ్నిస్తే ఏమని సమాధానం చెప్పగలరు?

మతం మారితే నిన్ను పట్టించుకునే వాడే లేడు... కానీ ఏ మతం వాడైనా పూజించే వేలుపు 'అమ్మ ' అని నేను అంటే దేవుడైనా జేవురించుకుంటాడా ?

అన్నం పరభ్రహ్మ స్వరూపమైతే మరి అన్నాన్ని వార్చిన అమ్మ బ్రహ్మాండాన్ని మించిన రూపమయ్యుండాలని నా నమ్మకం.

అమ్మ... చాలా అమాయకురాలు !

నేను ఎలా ఉంటానో ఎలాంటి వాడ్నో తెలియనితనంలోనే తన కడుపులో నన్ను దాచుకుని కాచింది..

అమ్మ... చాలా తెలివి తక్కువది!

ప్రపంచంలో తనను మించిన గురువులున్నారని భ్రమించి నన్ను బడికి పంపింది !

అమ్మ... ఒట్టి అబద్దాల కోరు..

నేను కడుపునిండా తినాలని తనకు ఆకలి లేదంటుంది!

అమ్మకు... అసలు పౌరుషమే లేదు..

తను నేర్పిన మాటల్ని తెలియని తనంలో తనపై ఈటెల్లా నేను వాడినా నవ్వుతుంది !

అమ్మ... నా పనులు నన్ను చేసుకోనివ్వదు..

నా బాధకు తనేడుస్తుంది.. నా సంతోషానికి తను నవ్వుతుంది..

నా రోగానికి తను లంకణం చేస్తుంది.. నా గెలుపుకు తను భుజాలెగరేస్తుంది..

అలాంటి అమ్మకు పుట్టిన రోజు అంటూ ఒకటి ఉందని.. ఉంటే అది ఈ రోజేనని నమ్మడానికి నేను సిద్దంగా లేను.. ఎందుకంటే అమ్మ పుట్టక ముందు ఈ ప్రపంచం ఎలా ఉండి ఉండేదోనన్న ఊహ కూడా నాకు అందడంలేదు ! 

అందుకే నేనంటాను.. ఇది నా "పుట్టిన రోజు" పుట్టిన రోజు అని.
(18.12.2014)